नयाँ व्यवस्थाअनुसार अब सूचीकृत कम्पनीहरूको सेयर मूल्य एकै दिन अधिकतम १५ प्रतिशतसम्म घटबढ हुन सक्नेछ। यसअघि यो सीमा १० प्रतिशत थियो। नेप्सेले यस परिवर्तनले बजारलाई अझ चलायमान बनाउने र मूल्य निर्धारण प्रक्रियालाई यथार्थपरक बनाउने अपेक्षा गरेको छ।

प्रिओपन सेसनमा पनि मूल्य उतारचढावको सीमा २ प्रतिशतबाट बढाएर ५ प्रतिशत कायम गरिएको छ, जसले बजार खुल्ने समयमा हुने अस्वाभाविक उतारचढावलाई नियन्त्रण गर्ने विश्वास गरिएको छ।

त्यसैगरी, नेप्से परिसूचकमा आधारित सर्किट ब्रेकर प्रणालीमा पनि परिवर्तन गरिएको छ। अब कारोबार सुरु भएको दुई घण्टाभित्र बजार सूचक ५ प्रतिशतले घटबढ भएमा १५ मिनेटका लागि कारोबार रोक्ने व्यवस्था हुनेछ। यदि सूचक ८ प्रतिशतसम्म घटबढ भएमा सो दिनको सम्पूर्ण कारोबार नै बन्द गरिनेछ।

पहिले ४, ५ र ६ प्रतिशतका तीन तहको सर्किट प्रणाली लागू थियो भने नयाँ व्यवस्थाले यसलाई घटाएर दुई तहमा सीमित गरेको छ।

नेप्सेका अनुसार मूल्य सीमा विस्तारले बजारलाई वास्तविक माग र आपूर्तिअनुसार छिटो समायोजन हुन सहयोग गर्नेछ। साथै, लगानीकर्ताका लागि खरिदबिक्रीका अवसर बढ्ने र कारोबारको मात्रा समेत वृद्धि हुने अपेक्षा गरिएको छ।